Reaksie van twee lentekoringkultivars op stikstof- en swaelbemesting in die Swartland. I. Vegetatiewe groei, opname en konsentrasie van stikstof en swael in die vegetatiewe plant

Abstract

Die belangrikheid van die korrekte N: S verhouding het die vraag laat ontstaan of 'n wanbelans tussen N en S nie gedeeltelik 'n bydrae tot die swak benuttingsdoeltreffendheid van N by hoë N-bemestings in die Swartland kan lewer nie. 'n Faktoriaalproef om die effek van 50-, 100- en 150 kg N ha⁻¹ in kombinasie met swaelvlakke van 0-, 12.5-, 25- en 50 kg S ha⁻¹ op vegetatiewe groei, N- en S-opname en -konsentrasie van die lentekoringkultivars Palmiet en SST 66 te bestudeer, is in 1990 en 1991 op Langgewensproefplaas uitgevoer. Plantmassa het nie tussen Palmiet en SST 66 verskil nie, maar toenemende N het dit verhoog. Geen betekenisvolle hoofeffek is met S verkry nie, maar die hoogste plantmassa is verkry waar 12.5 kg S ha⁻¹ in kombinasie met 150 kg N ha⁻¹ toegedien is. Die betrokke kultivars het nie in hul vermoe om N op te neem verskil nie. Met verhoogde N het N-opname, asook die konsentrasie N in die plante verhoog. Toenemende S-vlakke het met hoë N-vlakke by SST 66 'n verhooging in S-opname veroorsaak. Die S-opname van Palmiet is egter nie deur N be'invloed nie. Die belangrikheid vir genoegsame S in bemestingsprogramme vir koring waar hoë N-bemesting toegedien word, is in hierdie studie bevestig en sal in die toekoms toeneem omdat enkel- met dubbel superfosfaat vervang word.