E.K.K. Matlala: mongwadi wa ditaodišosengwalo tša mathomo tša Sepedi

Abstract

Maikemišetšo a nyakišišo ye ke go rarolla mathata a thulaganyo ya ditaodišo tša Matlala. Nyakišišo e babaletše go laetša bohlokwa le bokgoni bja Matlala go ngwalweng ga ditaodišosengwalo tša Sepedi, le ka fao a di rulagantšego ka gona go ya ka mehutana ye mene, ye nngwe le ye nngwe e emela mohutana wa yona. Ke gore, go yo bewa bokgoni bjoo bja Matlala leihlo, go bona ge e le mongwadi wa maemo wa ditaodišosengwalo tša Sepedi. Nyakišišo e tla hlahlwa ke teori ya naratholotši ye e beakantšwego, go šomišwa mokgwanyakišišo wa boleng, go hlaloša le go hlatholla ka ditaodišo tša Matlala. Datha e tla kgoboketšwa go tšwa kgoboketšong ya ditaodišosengwalo tša Matlala tša go bitšwa Mengwalo (Essays) Puku II (1943), e lebane le ditaodišo tše nne elego ‘Lexae’, ‘Fsika-thsipi la Ramosweu’, ‘Tato ya monnyana ke lesoxana’ le ‘Sakeng la bophelo’. Athekele ye e utolla ge Matlala a tšweleditše bokgoni bja go ngwala ditaodišo tša Sepedi ka bokgwari go ya ka lenaneothulaganyo la thaetlele, matseno, mmele le morumo. Katlego ye nngwe e tšwelela gape thulaganyong ya mohutataodišosengwalo ka go hlagiša bokgoni bja ditaodišosengwalo tše nne tšeo go ya ka thulaganyo ye e amogelwago ke maemo a bongwadi bja ditaodišo tša boditšhabatšhaba.