Tsitsinkelo ya molaetša wa dikošatšhaba tša Sesotho sa Leboa

Abstract

Tše dingwe tša ditsebi tša dibolelwa di tšea dikanegelotšhaba go no ba fela ditlošabodutu, e lego taba yeo ditsebi tše dingwe di e ganetšago. Dikošatšhaba tša Sesotho sa Leboa, bjalo ka dikanegelo tše dingwe tša bomolomo, ga di no tloša bodutu fela, le molaetša di a o tliša baopeding le go batheeletši. Maikemišetšomagolo a taodišwana ye ke go bea nyanyeng melaetša ya dikošatšhaba tše pedi tše di kgethilwego, go laetša gore ga go koša ye e se nago thuto. Dikošatšhaba tše pedi tša Sesotho sa Leboa di kgethilwego ka lebaka la go tsebega le go ratwa ga tšona setšhabeng. Go šetšwe mokgwanyakišišo wa boleng morago, moo go kgethilwego bakgathatema ba bakgalabje le bakgekolo bao ba šetšego ba filwe sedulagae. Kgetho ye ya thwii e hlohleleditšwe ke tsebo ya bona ya dikošatšhaba le maitemogelo a bona a bophelo le setšo. Se se hweditšwego ke go re ga go koša ye e se nago molaetša. Le ge dikoša di tloša bodutu, di bopa maphelo a batho ba go fapafapana. Koša ye nngwe le ye nngwe e tliša ntlha ye e itšego ya bophelo, e ka ba e le pepeneneng goba e khutile.