Tussensinse semantiese relasies

Abstract

In hierdie artikel word die aandag eers kortliks gevestig op die verskillende soorte semantiese relasies wat binne sinne en tekste voorkom. Een van hierdie relasies, naamlik die tussensinse semantiese relasies, word in besonderhede bespreek. Daar word aangetoon dat die tipe relasie tussen sinne gedetermineer word deur 'n aantal items wat konjunktiewe deskriptiewe bepalings is, wat onder meer sinskonnektiewe funksies het (Engels s-connectors). Hierdie items (gewoonlik geklassifiseer as nie-modusdeterminerende voegwoorde) is afkomstig uit verskeie soorte woorde en groepe respektiewelik. Die ‘konjunksin’, ingelei deur die konjunk, volg onmiddellik op die ‘voorsin’. As gevolg van hierdie opeenvolging word dié tipe relasie as 'n strukturele tussensinse semantiese relasie beskou. Die relasie bestaan uit verskeie subtipes, naamlik additiewe, adversatiewe, kousale, temporele, en alternerende relasies, afhangende van die bepaalde betekenis van die betrokke konjunkte.