Die invloed van fosfor, nitraat en ammonium op die opname en vervoer van stikstof en fosfor en op die groei van koring

Abstract

In 'n waterkultuureksperiment met koring is die invloed van verskillende P-toedienings (0,02 tot 5,0 me H₂PO₄ dm⁻³) en van verskillende NH₄:NO₃-verhoudings (0:15 tot 12:3) met 'n Hoagland-voedingsoplossing (no. 2) as kontrole bestudeer. Normale groei is reeds by 'n laer P-voorsiening (0,2 me dm⁻³) as die kontrole (1,0 me dm⁻³) verkry. Die hoogste P-voor-sieningsvlakke het opbrengs verlaag by die laagste NH₄: NO₃-verhoudings. Beter opbrengs is verkry met intermediäre NH₄:NO₃-verhoudings, waarvoor hoër P-voorsiening noodsaaklik was. By hoë P-voorsiening het chlorose-simptome tussen die blaarnerwe voorgekom wat vererger het met hoër NH₄:NO₃-verhoudings. Plantontledings dui daarop dat behalwe by die hoogste NH₄: NO₃-verhouding, die chlorose-simptome toegeneem het met hoër P-status in die bogroei. Die teenoorge- stelde tendens het ten opsigte van die P-status in wortels voorgekom. By hoë P-voorsiening is dit moontlik dat NO₃ die vervoer van P vanuit die wortels na die bogroei verminder en gevolglik die simptome wat met hoë P-status in die bogroei geassosieer word, verminder. Die N-status van die bogroei het verhoog van die laagste na die hoër P-voorsiening. Hierdie verhoging was meer wanneer slegs NO₃ voorsien is, as wanneer NH₄ en NO₃ voorsien is. Hieruit is afgelei dat P-voorsiening minder kritiek is vir N-opname as beide NH₄ en NO₃ voorsien word.